កណ្ដាល : នៅថ្ងៃអង្គារ ទី២៥ ខែឧសភា ឆ្នាំ២០២១ រដ្ឋបាលខេត្តកណ្ដាលបានប្រកាសអនុញ្ញាតបើកដំណើរការអាជីវកម្មផ្សារស្អាងខាងជើងឡើងវិញ ស្ថិតក្នុងឃុំព្រែកគយ ស្រុកស្អាង ខេត្តកណ្ដាល។

រដ្ឋបាលខេត្ត បានអំពាវនាវក្នុងពេលដំណើរការអាជីវកម្មផ្សារស្អាងខាងជើងឡើងវិញ បងប្អូនអាជីវករ និងសាធារណៈជនទូទៅ ត្រូវអនុវត្ត ឱ្យបានម៉ឺងម៉ាត់នូវវិធានការសុខាភិបាល រួមមាន ការពាក់ម៉ាស់និងការរក្សាគម្លាតសុវត្ថិភាព ព្រមទាំងប្រកាន់ខ្ជាប់នូវការធ្វើអនាម័យ ដើម្បីសម្លាប់មេរោគនិងការវាស់កម្ដៅ ជាពិសេសអនុវត្តតាមវិធានការ “៣ការពារ ៣កុំ” របស់សម្តេចតេជោ នាយករដ្ឋមន្ត្រី ជាចាំបាច់ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩។

រដ្ឋបាលខេត្តកណ្ដាល បានបញ្ចាក់ថានាយករដ្ឋបាលសាលាខេត្ត ស្នងការនគរបាលខេត្ត មេបញ្ជាការកងរាជអាវុធហត្ថខេត្ត មេបញ្ជាការតំបន់ ប្រតិបត្តិការសឹករងកណ្ដាល អភិបាល នៃគណៈអភិបាលស្រុកស្អាង ប្រធានមន្ទីរសុខាភិបាល នៃរដ្ឋបាលខេត្ត ប្រធានមន្ទីរ-អង្គភាពពាក់ព័ន្ធ មេឃុំព្រែកគយ គណៈកម្មការគ្រប់គ្រងផ្សារ និងបងប្អូនអាជីវករផ្សារស្អាងខាងជើង ត្រូវទទួលបន្ទុកអនុវត្តសេចក្តីសម្រេចនេះ តាមភារកិច្ចរៀងៗខ្លួន៕